ADAT NIAS

HADA NONO NIHA
            

Meno lafailo Hia walangi Adu, lafailo Hia walangi Sinada raya ba Nawalõ sia`a mbanua ba Gomo Sahaya-haya, bano maõga mbalõ zilõtõ danõ. Andrõ wa`awena lafailo yõu Gozo hela-hela danõ, bano zui mamuko danõ mo mbumbu ndiala, da`õ wa`awena lafailo duada Hulu mbõrõ danõ, ba`awena fadaya danõ mo`uli harita, awena mo`ahonoa sa`ae meno lafailo duada Daely Sobelua Ana`a.          Meno ato niha raya ba Mazingõ sihono, meno ato niha raya ba Mazingõ Lawira, ba oi mamariti Fole nono matua sabõlõ tõla, oi manuyu huwa ba darizi nono alawe silito talinga, ata`u mõi zolemba ba dõla nora, lõmõi khõra dome samakhai mbambatõ, lõsimõi khõra umõnõ samakhai fa`iwasa, melõ khõra fatõ-fatõ mbõwõ, lõ khõra su`a-su`a mbosi zalawa; oi nidõfai woha-woha gafore, tetelauru zamolo, zaga ni`omanu-manu, lagõlou mbulu wali`era, melõ sifao khõra mege melafailo mbua tekhe mbõwõ, notorõi yawa khõ duada Sirao uwu Zihõnõ, notorõi yawa khõ Nata Balugu Luo Mewõna, yawa ba Deteholi Hamo yawa ba Deteholi Ana`a.         

Andrõ waha samuza ha mane ma`õkhõ, hasamuza halaluo mbala, itema mangelifi nono alawe silito talinga raya ba Nawalõ sia`a mbanua raya ba Gomo Sahaya-haya imane “ He Ina, Ya`õtaka dalinga za`au madawa na mamagaõlõ afo nda`ugõ, ya`õ`ewa gawa-awa gaheu belewau namohalõwõ`õ; ya`aehu namagu bõrõ zatua ba nohi tugela moyo; ya mu`a namagu buaya Gomo Sahaya-haya, ba ya mulõgui doho nia na mofanõ ia; harumani sa`ae walõ fahuo-huo ami mangosara ba nawõmi Salawa. Itema inania imane : “Hana ae onogu, wa`õ`elifi-lifi ndra`aga amau bõrõ zatua, hana wa`õ`elifi ndra`aga satuau bõrõ zo`ono, hadia zifatimba ba dõdõu amuatama, alukhõ ma bõzi-bõzi`õ ua ba onogu, ba oiso ua gama-gama ana`au, oiso khõu nukha segebua bõli, hadia zo`ambõta nasa silõ mube khõu?.         

Itema ononia : “Tenga da`õ mbõrõ wamangelifi nda`o ina; hiza wõ ndaga`agu iraonomi, hiza ndaga`agu ono matua sabõlõ tõla, oi mamariti fole mbalazi wa`atua balõ manõ la`ila mangowalu; simanõ gõi nda`aga ono alawe silito talinga, oi dozi manuyu huwa ba darizi mbalazi wa`atua, balõ manõ ma`ila tobali sinõwu bõli gana`a; bõrõ khõmi mbõwõ silõ fatõ-fatõ, bõrõ khõmi wangai ana`a silõ su`a-su`a, lua-lua ina lõmasõndra wonga`õtõ sa`ae, hulõ mu`obõ nohi we`ina lo moliwiõ.         

Meno i`ombakha`õ khõ wo`omo nia inada bõrõ zatua, wangelifi nonora alawe Silito talinga; andrõ awena ifakaoni`õ Tuada Gozo ina mbõrõ Lewuõ raya mbanua Mazingõ, ikaoni zi tõlu ngafulu Zi`Ulu. ikaoni zi tõlu ngafulu Zalawa fefu mbanua Mazingõ-Lawira, fefu zowanua ba Nalawo sia`a mbanua, fefu zatua ba Gomo sahaya-haya, lalau mamagaõlõ lalau mangosara, oi dozi labe wangera-ngera ba angetulara lamane : “Duhu si`ai wangelifi nonoda alawe silito talinga, atulõ niwa`õ nia; datasofu yawa khõ duada Sirao Alizuzu Zihõnõ, datafasofuõ yawa khõ Nata Balugu Luo Mewõna; andrõ lafatenge Duha Nagaõsõ, da`õ wamõi Duha Nagalio, mõi nawõ nia zi dasiwa ono Zi`Ulu, i`ohe awõ nia zi dasiwa ono zalawa, yawa khõ Zirao Uwu Zihõnõ yawa ba dete ziholi ana`a yawa ba dete holi Hamo, yawa ba Danõ zi siwa nga`õtõ yawa mbanua sisiwa wenaeta.         

Andrõ wa lahalõ gangetula ira Zirao awõ zifitu ngafulu balõ zi`Ulu awõ zifitu ngafulu mbalõ zalawa yawa ba dete holi a`ana, meno latema gana`a tuli gero awõ mbawi fangandrõ saohagõlõ ni`ohe ndra Duha Nagalio; awena lafailo MBU`U TEKHE MBÕ`Õ zi siwa hekhe ba Gambõlõ zi siwa hekhe ba gabera, Ba`u wangombakha hewisa waõ-waõ mbosi wa`ona zalawa naso zimõi zolemba ba dõla nora; awõ mbosi hada naso zanõndra tõnu gahulua naso zihulu talinga zi`u, he mbosi wamanõi Balugu i`otarai wondõni õba ba Dalu irugi wa`a`ozu mbalõ halõwõ zamõsana.         

Meno tehare mba`u tekhe mbõwõ tou ba newali Duada Gozo sanema mbõwõ, ba awena ifuli ifakaoniõ zalawa zato ba wamondongogõ hadia zalua meno tohare Mba`u,  andrõ dozi latetekhe ba mbuatõ nomora woha-woha Gafore, oiso Zaga, Fali`era, Afore, balõ Gondrekhata, Lauru, Balazi nitugelai, wofo`usõ (wamaedo mbalaki), La`oro (wamaedo saga), wofo nazese (wamaedo Zese).         

Andrõ lazara-zara wama`oli, andrõ lazara-zara wo`urei latotarai wetaro ndaono badabina nina ofeta wa`amete.






HADA NONO NIHA BA WAMANÕI BOSI


1.             I`otarai meso ba dalu nina ndaono irugi 4 (õfa) waŵa ba dabina mani`u mamoni nama faoma ina, lataba manu õnadu siraha nulu ŵõrõma, ha ama ina sanõŵu zimanga ba ya`ira zamangandrõ.

2.             Nano tumbu ndraono ba lataba gurifõ ono mbawi famatõrõ dõi, ba namo`okhõta nama ikaoni dalifusõ ba wamatõrõ tõi ba mamuala zatua ba nono si tumbu mbõrõta lõfõ ma harazaki kho nono andrõ.

3.             Nano ebua ndraono tola itõrõ gutalua zalaŵa na fahuhuo, ba alau ba lõhõ, anakhõ-nakhõ; ba lataba nono mbawi õnadu : Fanuzu lõhõ.

4.             Nano ebua ndaono aro gari/manõi ba nohi tola itõrõ gotalua mbanua, ba lakata`õ ba alua wangelifi mofõkhõ ba lataba mbawi tefotõi : HOFI-HOFI.

5.             Nano ebua nono matua ba lafangowaluia; ba nano te`aso mbanua ba latahõ dõdõ mate mbawi tõlu nga`eu inõnõ tõlu firõ (3F) nikhõkhõ gana`a ba gefe hada f. 1.50 (sambua amatonga firõ) wamatõrõ dõi mbene`õ.

6.             Nano mangahalõ ira ba ahulu ba gokhõta lasõndra gana`a ba si`ofona wamõzi ana`a sa`i-sa`I, bahõgõ ndra`alawe, ba Famuru ba dalinga; ba latahõ dõdõ gana`a tõlu nga`eu mbawi inõnõ f. 3,- wamahowu gana`a latema zatua mbanua da`õ.

7.             Namonõnõ hara zaki ibõbõzi ingarotoi; ihalõ mbawi 3 nga`eu ba f. 3,- ana`a famahowuõ, latõtõi niha andrõ ngambatõ.

8.             Natedou wa`amokhõta niha andrõ, ba isõndra ia tahi, ba mofõkhõ; ba latunu manu we`anõi Banua, fetaro ba hili-hili Danõ mate mbawi sageu inõnõ 3×5 saga, gana`a 4+2= f.6,- ba owulo Dalifusõ itarai lafaõgõ wama`oli nga`eu niha; Sanuhe, Tambalina, Fahandrona, Si daõfa, Si dalima, (Dalima ira fefu), sageu mbawi õ zite`oli, tambai zataha, ba tambai zasoso ba labe`e niko`o barõ wakhe.

a.    Ibe`e gana`a fogai dambalina sambua zi walu, sambua zese               : f. 8 + f. 4 = f. 12

b.    Ibe`e gana`a fogai wahandrona sambua sibohou                                : f. 6,-

c.    Ibe`e gana`a fogai zi daõfa tambali siwalu                                          : f. 4,-d.   Ibe`e gana`a fogai zi dalima tambali zese                                            : f. 2,- 

         Na`ifalua halõŵõ we`amõi ngawanua awena ihare`õ zangai halõwõ darua nono matua, darua nono alawe, ihalõ sageu mbawi latõtõi : Fangahare zangai halõwõ.          Namo awai halõwõ ba no ahori te`anõ zoguna, ba ikaoni Dalifusõ fao Mbanua ihalõ mbawi sageu tefotõi Bawi wangosara. Awena lakaoni zato ira matua, ira alawe owulo barõ Gare faekhu ba danõ walõwa, si`ofõna la`owai, Labe nafo, fahuhuo zalawa awena manga sageu zasoso tefotõi Nisõlõ. Owi-owi mege sageu ndiwo Nuwu, meno awai manga ibe`e gõmõnia ana`a ba mbawi 3 nga`eu gõ mbanua, labagi awena ibe`e gõmõ ana`a :

9.             Nano to`ese mbosi niha tedou gokhõta, ba lahalõ ia tambalina ba Nõri, ba mazui ibõbõzi Gofia ena`õ ba mazui fakake nibe ba hõgõ fao wa`itahõ dõdõ Gana`a.

a.              Tuli Gero ba Nadu 3×5 saga, gana`a 2+1=                f. 3,- sinema nama talifusõ.

b.             Tuli Gero ba Lawõlõ 3×5 saga, gana`a 2+1=             f. 3,- sinema zatua nia.

c.              Tuli Gero ba Ziraha Gosali  gana`a 2+1=                  f. 3,- sinema zalawa mbanua.

d.             Famahowu Tambali ziŵalu                                      f. 4,- sinema mbanua sato.

e.              Ikhu Doho 3 wa 5 Saga 2+1                                      f. 3,- sinema zatua mbanua.

f.              Angotõla wamahoŵu 3 wa 5 Saga                            f. 3,- sinema zitenga bõ`õ.          Nano itõrõ da`õ fefu lafotõi ia : NGAŴANUA. Bosi nia 4 Mbalaki, 2 Ziŵalu, 2 Zese.

10.         Na tedou Gokhõta niha, ba i`sõndra tahi mofõkhõ, ba latunu manu ba Nõri khõnia latuyu zi te`oli, irugi zi Dafitu niha awõ zanuhe; ba ibu`a Gõmõnia ana`a, fabali wa`ebua wo`õmõ Ana`a ba mbosi ngawanua, ba ibunu mbawi 6 nga`eun. Bosi nia 4 Mbalaki, 3 Ziŵalu, 3 Zese.

11.         Famalua wamatõ õri, nano itunu manu ba nõri ba ifatõ nõri ba mate mbawi 12 nga`eu ba õmõ ana`a fabali wa`ebua moroi ba wanunu manu ba nõri Ba tola sa`ae ibõbõzi zaembu ba Nindrandra awõ ŵa ifalua Gowasa gana`a Fanõgi Doyo Nasoa latõtõi ia SALUA ÕRI tebe`e tõi nia BALUGU. Bosi nia 4 Mbalaki, 4 Ziwalu, 4 Zese

12.         Nitõtõi Õri Nungo Nidanõ, ba nga`õtõ nõri zatua lafotõi INA MBÕRÕ LEWUÕ

13.         Namofõkhõ mbalugu andrõ la`alui Dahi zalawa sato; fangai Hõgõ (Binu), ba latawi Gari yawa ba Nadu zatua awena dõhõ wõkhõ, aefa da`õ milo zangai Hõgõ labe gana`a khõra bele-bele dõla mbagi ba we`amõi manõkhõ faebua 12 ziwalu, felendua zese, ba folayatõ na mangawuli. Naso khõra khõgõ awena ibe`e.Nalõ milo wangai hõgõ, lahalõ ndraono larorogõ mendrua fakhe awena labõzi mbagi mõi mbanua sato mate mbawi 6 nga`ue ba lataŵi hõgõ ba Ganda Uli gosali hada ba lafalua Gowasa HÕGÕ; 12 nga`eu mate mbawi segebua ba ibe`e gõmõ ana`a :

Fanawi Gari                                     Sambua siwalu  f. 6,-

Fombehugõ Hõgõ                            Sambua siwalu  f. 6,-

Fanõrõ Ose`ose                               Tambali Mbalaki                              f. 12,-

Ba lafangõrõ-ngõrõ ba Golayama, ba ibe`e nasa gana`a tandraya tõla gae ba zalawa zamõzi mbagi Binu 3×5 fulu Saga Mbalaki faebua f. 9,-

Tõi zino manõrõ mbosi i`otarai nomero sara ofeta zi felendua lafotõi : SATUA NUNGO NIDANÕ, ma INA MBÕRÕ LEWUÕ.  Bosi nia 12 Mbalaki, + 12 Ziwalu, + 12 Zase.


4 Comments

Add a Comment
  1. Hi, Neat post. There’s a problem with your website in internet explorer, would check this

  2. My husband and i have been really excited Chris managed to finish up his reports while using the precious recommendations he grabbed from your very own blog. It is now and again perplexing just to choose to be giving away thoughts that many some other people may have been trying to sell. So we grasp we now have you to be grateful to for that. The entire illustrations you made, the simple website menu, the relationships you will give support to create – it’s many wonderful, and it is leading our son in addition to the family believe that this matter is excellent, and that’s tremendously indispensable. Many thanks for all!

  3. Thank you so much for giving everyone an exceptionally marvellous possiblity to read in detail from this site. It really is very awesome plus stuffed with amusement for me personally and my office fellow workers to visit your site nearly 3 times per week to find out the newest tips you have. Not to mention, I am also always astounded with the special secrets you serve. Certain 2 ideas in this post are undoubtedly the very best I’ve had.

  4. A lot of thanks for every one of your labor on this site. My mother delights in setting aside time for research and it’s really easy to see why. Many of us learn all of the compelling mode you convey great tactics via your web blog and even improve contribution from other people on the subject matter then our favorite princess has been becoming educated a lot of things. Take pleasure in the remaining portion of the year. You are doing a stunning job.

Tinggalkan Balasan

Alamat email Anda tidak akan dipublikasikan. Ruas yang wajib ditandai *